Sharing Geguritan / Puisi Jawa

Kandha

aku dudu sopo-sopo...

ugo ora duwe bondho donyo...

aku ora arep takon ngopo...

aku pancen ora biso...

isaku meng rumongso......

panceno,aku karo kowe ora podho...

ewosemono,yen entuk ngudho roso...

aku meng arep kondho...

aku kancanono...

_________________________________________________

Rasa Cuwa

Sliramu kang lunga

kelingan aku nalika semana

sliramu kang tuwuh katresnan

nandang wuyung mring donya

karonto-ronto miyak kahanan

metani kedadeyan semana

kelingan aku nalika semana

sliramu kang tuwuh waspa

menehi rasa kang cintraka

sliramu tansah lunga ngendani rasa

rasa cuwa sliramu ora kelingan nalika semana

menawa mendung arep... dadi udan

cuwa aku sliramu lunga

nglungani aku aku pancen marahi cuwa

_________________________________________________

Lunga

menawa sliramu lunga

aja ninggal bronto

netramu netes luh

lunga sliramu marahi bronto

...sliramu lunga ngendani bronto

mega ampyak-ampyak nguntapake lungamu

sliramu pancen ora bisa kapenggak

lungaa menawa sliramu lega

lega marang kahanan

aja cuwa menawa aku uga lunga

lunga mring kadadeyan

_________________________________________________

Sing Bisa Rumangsa

Kawulo Namung Tiyang Ndesa

Sangu Kulo Namung Pitutur Klawan Donga

Namung Satunggal Bandha Dunya Kulo

Mboten Sanes Kasebut Jiwa Kalawan Raga

Sanes Satriya Sanes Pandhita

Namung Sudra Ingkang Ngambara

Mboten Kagungan Empan, Mboten Papan

Mboten Sanak Mboten Kekadhang

Titah Sudra Ngambara Hakekat

Gegaman Satunggal Kasebut Jimat

Sastra Jendra Hayuningrat

Kalimasada Sejatining Ma ’rifat

Sing Sapa Bisa Rumangsa

Sejatine Kang Temen Bisa

Sing Sapa Rumangsa Bisa

Sejatine Janma Kang Durung Sampurna.

_________________________________________________

Werdining katresnan punika

rerakit lumampahing mangsa kang ngukir lembaring dalu rina

kang sinerat dening astaNya.

Werdining katresnan punika;

reroncening trenyuh kabagyan,

kang medal saking panangis lan gumuyu,

trus rumesep ing telenging kalbu.

Werdining katresnan punika;

angaksami tumrap sadaya kalepatan,

nampi samukawis klentu pakarti tuwin sisiping pitembung.

Werdining katresnan punika;

sabar sareh ugi nampi samukawis panandhang

lamun pedhut pacoban hanelahi, katresnan kinarya pepadhang.

Werdining katresnan punika;

rak ugi sami pitados lan manungkung jroning pangajeng-ajeng;

awit katresnan salaminipun langgeng.

Werdining katresnan punika;

peparingan Gusti Allah

katresnan kang mekar ing telenging manah,

konjuka ing Ngarsa Pepadhanipun…

_________________________________________________

kairing angslup hyang bagaskara
kang endah memba warna
dirgantara hanyilak ing sisih gumuk
mung werna kang dadi renaning gegana

duh gusti
wus tumeken ing wanci
sirnaning cahya surya kairing jumeduling candra ndadari
angresep ing salira

_________________________________________________

kamangka lumaku ing salumahng bantala
lir kadya ing madya wana
anemah sakabehing pacoban
sedya ungguling salira

mung kang pada sabar
bakal nrima lan mrangguli ananing katentreman jiwa
dene sira lirwa ing tata lan cara
mung kaendahan kang dadi pangangen
sirna tan rupa